බලහත්කාරයෙන් WhatsApp Group වලට එක් කර ගැනීමේ විශාල කරදරය..

මේ ලෝකේ හැම මනුස්සයට ම බණ ඇහෙන්නෙ නැහැ.. උපතින් ම බෞද්ධ වුණත් ලෝකේ තියෙන කාර්යබහුලත්වය එක්ක මිනිසුන් බණ අහන ප්‍රමාණය හරිම අඩුයි.

විනාඩි ගාණක් තියෙනන Joke Video එකක් මිලියන ගාණක් බැලුවත්, පැයක් අවධානයෙන් බණ අහන්න පුළුවන් වන මිනිස්සු ඉතා ම අඩුයි.

ඉතින් අපි අවුරුදු ගාණක් චැනල් වල බඩගාලා, රට රටවල් වල බඩගාලා, ගම් දනව් වල බඩ ගාගෙන, රෑ රෑ වාහාන කැඩුණාම පාරවල් වල ඉඳලා, ගම් පළාත් වල වැඩම කරනකොට කාණු වල වාහාන වැටිලා කොහොම හරි මිනිසුන්ට බණ කියලා ඒ මිනිසුන් ගේ ඔලුවට සංසාරය ගැන කතන්දරය කියලා දීලා ඔන්න භාවනා කරවන්න කියලා ආරම්භ කරවලා උදව් කරන්න කියලා WhatsApp Group එකකට ගන්නවා..

ඒ මිනිස්සු භාවනා කරනවා, පින්කම් කරනවා ඕක අස්සේ ඉන්න බිල්ලො කීප දෙනෙක් බලන් ඉන්නවා. මම උන්දැලට කියන්නෙ #බිල්ලො කියලා..

ඩැහැගන්න වගේ බලන් ඉන්නවා. ඉඳලා මොකක් හරි ගෘප් එකක් අටවගන්නවා.

👉 එක්කො පාරේ ඉන්න බල්ලොන්ට උයලා කන්න දෙන ගෘප් එකක්.

👉 නැත්තන් එහෙ මෙහෙ චූඩා මාණික්‍ය පූජා කරන ගෘප් එකක්.

👉 නැත්තන් පන්සල් හෝ කුටි හෝ හදන ගෘප් එකක්.

👉 නැත්තන් එක එක හාමුදුරුවොන් ගේ Short Clip දාලා, Pramotion එකක් වගේ එකක් කරගන්න අය..

හරි මේ ඔක්කොම හොඳ දේවල් නේ.

නමුත් අර වැඩ දාහක් අස්සේ භාවනා කරන්න ඔලු හදාගෙන භාවනාවට, ධර්මයට එන මිනිසුන්ට මේක හරි ම විශාල කරදරයක්.

හොඳ වැඩක් වුණත් කරන්න විදියක් තියෙනවානේ. බලෙන් තමන්ගේ ගෘප් වලට මිනිස්සු ඇඩ් කරගෙන ධර්මය කියලා දෙන්න යනවා කියන්නේ අමු වංචාවක්. තමන් ගේ බඩ වියත ගැන හිතලා අහින්සකයොන්ට කරදර කරන.

නැත්තන් ඒක ගිහි ජීවිතයේ වැඩ දාහක් කරන ගමන් ඉඩ තියෙන වෙලාවට ධර්මයේ ටිකක් හැසිරෙන්න Phone එක අතට ගන්න අහින්සක මිනිසුන්ට වදයක් විතරයි.

මුකුත් ම නැතිව ගෙදරට වෙලා ඉන්න උපාසක උපාසිකාවන්ට මේක ගැලපෙනවා වුණාට, පිළිවෙලට වැඩක් කරන්න හදන මිනිස්සු ටිකට මේක කරදරයක් කියන එක මුලින් ම තේරුම් ගන්න.

ඇත්තටම දැන් දැනුමක් තේරුමක් තියෙන මිනිස්සු WhatsApp Group එකකට එන්නත් මැළි යි. මේ බිල්ලොන්ගෙන් බේරුමක් නැති නිසා.

මොකද පස්සෙ පස්සේ පුද්ගලික පණිවිඩත් යවනවා. සල්ලි එකතු කරන්න හෝ මොනා හරි පින්කමක් හරි දාලා..

ලැජ්ජ නැතිව ටිකක් සමාජය අඳුරන ස්වාමින් වහන්සේලාගේ නම් පවා දාගන්නවා. පින්තූර දාගන්නවා. දාගෙන කපටිකමින් මිනිස්සු එකතු කරගෙන පස්සේ ගෘප් ගානේ හිඟාකනවා. නැත්තන් ඒවා උන් ගේ දායක සභා කරගන්න පොරකනවා. මුලින් අර සමාජය දන්න හාමුදුරුවෝන් ව විකුණලා.

Facebook එකක හරි පින්කමක් කරපු අම්මෙක්, අක්කෙක්, අයියෙක්, තාත්තෙක් මෙන්ෂන් කළොත් අදාල කෙනාගේ Inbox එක Facebook යාචක හාමුදුරුවරුන්ගෙනුයි, පින්කම් බිල්ලො ටිකගෙනුයි පිරෙන්න දවසක් වත් යන්නෑ. අපි ඒකයි කාවත් Mention කරන්නැත්තේ.

මේක කිසිම සදාචාරයක් නැති මිනිසුන් ගේ වැඩක්. කාවවත් බලෙන් ගෘප් වලට එකතු කරන්න එපා. මිනිසුන්ට ගෘප් එකේ අවශ්‍යතාවය කියලා Link එක යවන්න. එතකොට කැමති මිනිස්සු එකතු වේවි.

අනුන් ගේ ගෘප් අස්සට රිංගලා ඒ Contact සේව් කරගෙන ඒ මිනිසුන්ට කරදර කරන්න ගත්තාම ඒ මිනිස්සු භාවනාවත් එපා වෙලා මුල් කාලේ එලියට විසි වෙන්න පුලුවන් ඉඩ කඩ වැඩියි.

මිනිස්සුත් තමන්ට අවශ්‍ය නැති හැම ගෘප් එකකින් ම Exit වෙන්න ඉගෙන ගන්න. බලෙන් Add කරන හැම ගෘප් එකක් ම Report කරලා Exit වෙන්න.

අපේ භාවනා මධ්‍යස්ථානයට අදාළ ගෘප් වර්ග කිහිපයක් තියෙනවා.

👉 දායක පින්වතුන් ඉන්න Sujatha Puthra Group. (Ex - Sujatha Puthra | 01)

👉 භාවනා කරන පින්වතුන් ඉන්න Meditation Community Group. (Ex - ශුෂ්ක විපස්සනා Community)

👉 පින්කම් කරන Giving Sunday Group එක.

ඔච්චරයි. ඔයිට අමතරව Admin වැඩ ටික වෙන Family, Relations Groups ටික..

ඕවාගේ ඇතුලේ ඉඳලා WhatsApp බිල්ලො ටික ඩැහැගත්ත පින්වතුන්ට වෙච්චි කරදරය ගැන අපිට කරුණා කරන්න. එය අපේ පාලන සීමාවෙන් ඔබ්බට තියෙන එකක්.

කලින් ඔය ගැන වෙච්ච කතන්දර ටිකක් මං හම්බුණොත් Comments වලට දාලා තියන්නම් 🙏

ඔය වගේ ම YouTube බිල්ලො ටිකකුත් ඉන්නවා. ඒ කරදරය මේ දවස්වල ඉවර කරගෙන යන ගමන් ඉන්නේ. පස්සේ චැනල් එක ගියා, නැතිවුණා කියලා අඬාගෙන එන්න නම් එපා. ඔක්කොම චැනල් ටිකට Copyright දාලා ඒ චැනල් ටික අයින් කරවනවා.

මොකද, නැත්තන් මේක ඉවරයක් වෙන මගඩියක් නෙවෙයි.

බිල්ලො ටික Fake Account ටිකකින් ඇවිත් Comment එකක් දාලා බැනලා යන්න 😁 එතකොට තමන් ගේ හෘද සාක්ෂිය ම කියාවි තමුන්ලා ට තමයි මේ බිල්ලො කිව්වෙ කියලා.

✍ Author: Ven. Kirulapana Dhammawijaya Thero

Date: 22.12.2023